Nantu à a Tela Corsa : www.corsefootball.fr, memoria di u ballò corsu

 

 

 

 

Mentri chì i nosci squadri di ballò si facini di più in più rimarcà nantu à i stadii pà issi Francii, nantu à a tela, ci hè dinò un situ chì cummencia à attirà l’attenzioni di u pubblicu corsu. CorseFootball, situ chì tratta unicamenti di ballò nustrali, pidda pocu à pocu impurtenza nè u paisaghju internet di tutti l’appassiunati di u ballò tondulu, è ci n’hè parechji ! Piccula uchjata nantu à iss’iniziativa bedda, è u so criatori, Michel Bernard.

Numarosi sò quiddi chì vi podini cuntà stratti di storia spurtiva corsa. Anziani ghjucatori, accaniti è altri ghurnalisti chì, tandu è ancu avà, attraversani a Corsica suvitendu l’avvenimenti spurtivi. Di pettu à u ballò, ricordi, i menti ne sò pieni. Quantu sò, ingiru è drentu à i noscii stadii, à cuntà vi qualchi pezzi, gluriosi ò micca pò dipenda, di scontri di ballò chì l’ani marcatu ? È quantu sò ad ascultà, saliva in labbri ? Segnu chì a storia di u ballò corsu intarissa, sopratuttu i maghjini ch’idda trasporta è tramanda.

 Mighè Bernard, criatori di u situ www.corsefootball.fr, hè unu di quiddi chì issa storia appassiona. Per quessa ch’iddu a decisu d’addunì tutti l’archivii dispunivuli di u passatu, più ò menu luntanu, di ghjoc’aballò. Ritratti, scehti di ghjucatori, filmati di scontri, è altri foglii di scontru sò da ritruvà nantu à u situ. Vechji cum’è ghjovani ci podini ritruvà certi passaghji, certi ricordi di a so ghjuventù, poc’imprema a squadra circata. Fora di i squadri i più impurtanti, si trovani dinù quiddi chì, oghji, sò in traccia di fà si un nomi à liveddu amatori. Effettivi è sciffri, tuttu ci hè !

U webmaestru è criatori di u situ ci ne parla, in lingua noscia. 

" Pensu chi c’era una mancanza '

- Prinsintetivi appena : quali seti, è comu vi hè ghjunta l'idea di fà un situ nantu à u ballò corsu?

 - A mo casata hè Bernard, Mighé. Sò 53 anni  è sò  impiegatu di banca in Bastia. In l’annu 1972  sò  andatu pà a  prima volta à vede un scontru di ghjocu à pàllò in Furiani (Bastia –Lens in coppa di Francia) à l’epica di Kanyan, Papi, Franceschetti etc… è  cusì, ghjè nata sta passione .

Aghju subitu  cuminciatu a riempie paracchji quaterni cù statistiche senza sapè ben intesu ch’un ghjornu tuttu què puderia serve !

Prima, vulia fà un libru nanta a storia di u Sporting è pò hè ghjuntu « internet » allora aghju pensatu chi saria  megliu di utilizà questu novu strumentu, chì ripresentava l’avvene. Ma aghju vistu in furia ch’ ùn c’era tanta affare nantu u ghjocu à pàllo pè l’altre squadre corse, allora aghju decisu di fà CorseFootball .

 

- Chì si pò truvà nantu à u situ? Quali sò i categurii i più ricchi?

 - U SC Bastia ripresente a parte a più ricca di u situ, micca sulamente  perchè ghjé a mo squadra ma sopratuttu si po di chì ghjè ancu  “A Squadra di a Corsica sana”.  Aghju messu u fogliu di macciu pè tutti i  scontri dapoi u 1965 è ghjè  quasi simile  pè l’ACA, u GFCA, è ancu u fogliu di nutizie  pà quasi tutti i ghjucatori . Si tratta ancu d’attualità, di l’amatori  (da a DH à u CFA) è pè u restu vi lasciu scopre!

 

- Comu feti pà raccoglia tanti infurmazioni è tanti archivii?

Pà raccoglia l’infurmazione oghje mi servu principalmente d’internet, è pà l’archivii, di tuttu ciò chì aghju « cullettatu » dapoi ch’eru zitellu, sinnò  saria impussibile a fà tuttu  stu travagliu oghje, è pò ci sò  cuntribuzione  di l’amichi chì mi facenu passà  qualchi fotografie .

 

 - Chì sò i vosci idei pà amigliurà u situ? Ci sarà nuvità da quì à pocu?

 - Prima, pensu chì ci vole à cumplettà in furia a storia di u Sporting, u GFCA è di l’ACA, è què, ghjè digià un travagliu  cunsiderevule .

E nuvità, certu ma ùn ne possu ancu parlà, perchè prima, vogliu ancu cunsacrà una piazza più cunsistente  pè l’amadori  è ghjustappuntu, aghju bisognu di l’aiutu di  tutte e squadre (DH à Naziunale) è spergu chì a mo chjama sarà intesa. Bisogna  quantunque a sapè chì stu situ mi piglia à pocu pressu 5 ore pè ghjornu dapoi un annu, dunque mi pare difficiule di pinsà à apre d’altre rùbriche prima di compie ciò chì a ghjente po digià truvà nantu u situ.

 

- Comu u pubblicu internet corsu hà ricevutu u vosciu travaddu?

Pensu sinceramente chì a ghjente hà ricevutu pusituvamente stu travagliu, è v’invitu a fighjulà  u  Libbru d’Oru. Aghju ancu avutu parecchji parole d’incurraghjimentu nantu a Camperemu, u situ di Populu Turchinu. Pensu chi c’era una mancanza è da tutta manera vulia fà qualcosa di novu, qualcosa ch’un esistia dighjà, è un hè nancu finita … vi la possu dì!

A stima di a ghjente mi dà a forza pè andà più avanti ma oghje, l’ostàculu maiò pà mè hè di fà cunosce ancu di più « CorseFootball »  è ne prufittu pà ringrazià tutti quelli chì sò dighjà  venuti   à percorre u situ è benintesu  Corse Net infos pà l’intervista.
                                                                                                                         Liviu CASTEL 

Écrire commentaire

Commentaires: 1
  • #1

    Ghjuvan Lavighju Bartoli (dimanche, 22 juillet 2012 21:37)

    Très bon site effectivement. Découvrez aussi le blog de mon ami René Casamatta "CorsicaFoot" http://corsicafoot.canalblog.com/
    Des milliers de documents sur les footballeurs corses.Un travail d'archives remarquable à mon sens.
    Bona sera a tutti.
    GLB